之前講起禮賓府,話曬經歷咗一百多年歷史,令阿史疑惑當中有無一啲不為人知嘅故事,搵搵吓又居然有,整定要同大家分享。話說禮賓府(當時係港督府)响日治時期被侵佔,都市傳言話,日本居然留低一個惡毒法器「厭勝棒」,支棒依家仲留响禮賓府之內。

當年時任港督楊慕琦向日軍投降,港督府就落入日軍之手,而26歲嘅日本工程師藤村清一1942年奉命完成圖則,加建中央塔樓同作其他改動,座塔樓到依家仍然存在。據講日軍投降後,楊慕琦返去港督府,發現入面插咗支木棒,吊詭嘅地方在於每次職員想掉咗支木棒,都有意外發生,慢慢支棒變成「生人勿近」,甚至留到回歸之後,有講法仲提到前特首曾蔭權雖然信教,但依然搵風水師傅整咗個神壇鎮壓支棒。

有風水師傅話,日本二戰時侵略東南亞,經常會用到厭勝之術,意思係會响被佔領嘅重要地方插金屬樁或者木棒,用嚟斷咗其他地方嘅「龍脈」,象徵永遠受日本管治。位風水師傅仲話,戰後南韓修補日治時期嘅建築,居然發現數以千計厭勝棒,連青瓦台都中招,搞到要發散啲士兵去清理,修補返國運咁話。

網絡有相片顯示,禮賓府嘅木棒刻有日本老牌建築商「清水組株式會社」嘅字樣,間建築商於日軍侵略亞洲期間,响唔同地方興建日式建築,部份好似被改動過嘅禮賓府咁,保留至今。雖然傳言話厭勝棒同風水有關,但亦有人質疑支棒會唔會其實只係當日改建時所留低嘅建築材料,講咗咁耐,最後真係不得不問句:係真唔係呀?

圖為禮賓府塔樓。圖片嚟自禮賓府網站。